Ótrúlegur árangur áburðardreifingar
Tveir tugir fullorðinna og börn að auki dreifðu áburði í hlíðum Eldfells á mánudagskvöldið og nutu veðurblíðunnar til að láta gott af sér leiða í uppgræðslu lands. Árangur verkefnisins lætur ekki á sér standa.
„Það er alveg ótrúlegt að sjá breytinguna frá því í fyrra, ég hefði ekki trúað því að óreyndu. Núna óðum við í grasi þar sem áður var gróðursnauð hlíðin!“ segir Guðmunda Bjarnadóttir, fiskverandi og varastjórnarmaður Vinnslustöðvarinnar.
Addi í London ljósmyndaði áburðardreifinguna.
Hún stýrir uppgræðsluverkefni í Eldfelli sem á rætur að rekja til sjötugsafmælis VSV á árinu 2016. Stjórn félagsins ákvað að veita tíu milljónir króna til uppgræðslu á þremur til fjórum árum í samvinnu við Vestmannaeyjabæ.
Dreift var áburði í þriðja sinn núna í vikunni og þráðurinn verður tekinn upp að nýju sumarið 2018.
Skeljungur er nú kominn í verkefnisstjórnina og gaf allan áburðinn sem dreift var.
