„Hrognin eru að koma, gerið kerin klár“
Bubbi söng um loðnuvertíðarstemninguna á Eskifirði á Ísbjarnarblúsplötunni 1980. Nákvæmlega þetta og miklu meira til fæst áhöfnin á Kap VE við í dag. Hún er að gera klárt fyrir hrognin.
„Vertíðin gengur ljómandi vel það sem af er, við höfum farið í fjóra túra og komið með 700-800 tonn að landi í hvert sinn. Stoppað stutt við á miðunum. Nú eru hrognin næst á dagskrá. Verið er að þrífa lestarnar og við leggjum úr höfn í kvöld eða á morgun,“ segir Jón Atli Gunnarsson, skipstjóri á Kap, staddur í Vestmannaeyjahöfn.
Jón Atli og áhöfn hans á bolludaginn 2018!
„Skipin náðu afla strax eftir að brælu linnti og eru flest á útleið aftur. Veðurspáin er góð svo langt sem séð verður, sem er mjög mikilvægt.
Nú þarf að finna loðnu með nægjanlegum hrognaþroska sem jafnan er mestur í torfum fremst í göngunni. Það er samt ekki algilt.
Eitt er víst að loðnuveiðar eru aldrei eins frá ári til árs og spennan hjá fólkinu við veiðar og vinnslu í landi gerir þennan tíma svo skemmtilegan.
Loðnan er mjög góð og hátt hlutfall hrygnu í aflanum. Vel gengur að heilfrysta fyrir Japansmarkað en nú er komið að hrognatökunni, verðmætasta hluta veiðanna.
Mér finnst loðnan veiðast heldur dýpra fyrir landi nú en til dæmis í fyrra og hún er mjög víða. Það er enn loðna í Meðallandsbugtinni, hún er úti fyrir Reykjanesi og fyrir norðan land líka.
Mun meiri rannsóknir skortir til að átta sig á hegðun loðnunnar. Svo þarf þorskurinn sitt og hvalirnir éta óhemju líka. Við erum í samkeppni við hvalina!
Ekki ætla ég að dæma um hvort loðnukvótinn er við hæfi núna eða óþarflega varlega metinn. En ef miklu meira er af loðnu í kringum okkur en mælingar gefa til kynna er dýrkeypt fyrir þjóðina og þjóðarbúið að auka ekki við kvótann. Þá fara mikil verðmæti í súginn fyrir lítið.“
- Meðfylgjandi myndir voru teknar um borð í Kap VE í Vestmannaeyjahöfn síðdegis 12. febrúar, áður en skipið lagði upp í fyrstu veiðiferð loðnuvertíðar í ár. Sindri Viðarsson, sviðsstjóri uppsjávarsviðs, og Sigurgeir B. Kristgeirsson, framkvæmdastjóri Vinnslustöðvarinnar, hittu áhöfnina að máli og köstuðu kveðju á mannskapinn.
- Sindri fór yfir ýmis praktísk mál, öryggismál og fleira. Svo var rætt góða stund um stöðu og horfur á loðnumiðunum og útlitið á mörkuðum fyrir loðnu og loðnuafurðir.
- Þeirri spurningu var meðal annars varpað fram hve lengi íslensk stjórnvöld ætluðu að hanga á viðskiptabanni gagnvart Rússlandi, pólítískri aðgerð sem fyrst og fremst stórskaðaði Íslendinga og íslenskt þjóðarbú. Sú spurning lifir enn án svars.
- Kokkurinn sá til þess að gott var með kaffinu af tvöföldu tilefni, annars vegar til að halda upp á upphaf loðnuveiða og hins vegar til að fagna bolludegi. Álitlegar og bragðgóðar voru til dæmis bollurnar með fagurbleika kreminu.
- Þeir sem vildu halda sig frá sætindum sneru sér að næsta borði. Þar var fjölbreytt úrval ávaxta. Þarna var fyrir öllu séð.
Sindri Viðarsson skrafar við áhöfnina á Kap. Jón Atli skipstjóri er miðjumaður þeirra þriggja sem næst sitja.
