Nemendur í 5. bekk Grunnskóla Vestmannaeyja komu í heimsókn í uppsjávarvinnslu Vinnslustöðvarinnar í lok síðustu viku og kynntu sér loðnuna.

Að sögn Lilju Bjargar Arngrímsdóttur, mannauðsstjóra Vinnslustöðvarinnar, voru þetta alls 55 nemendur úr 5. bekk. Heimsóknin er árlegur viðburður og hluti af góðu samstarfi við skólann.

Loðnan er fiskur árgangsins hjá nemendunum og hafa þau þegar fræðst um hana í skólanum. Með heimsókninni fá þau tækifæri til að kynnast fisknum enn frekar og sjá hvernig vinnslan fer fram í raunverulegu starfsumhverfi.

Fyrir mörg barnanna var þetta jafnframt fyrsta heimsókn á vinnustað foreldra sinna, sem gerði daginn enn eftirminnilegri.

Það sem vakti sérstaka athygli og gleði var að fá að klæðast sérstökum hlífðarbúnaði áður en farið var inn í vinnslusalinn. Það eitt og sér skapaði mikla stemningu og jók spennuna fyrir heimsókninni.

Að fá að ganga um fiskvinnslu og sjá starfsemina með eigin augum styrkir skilning nemendanna á mikilvægi sjávarútvegsins fyrir samfélagið.

Í lok heimsóknarinnar voru krakkarnir leystir út með nammipokum, sem vakti mikla ánægju að vanda.

Heimsóknin tókst afar vel og er dýrmætur þáttur í að tengja næstu kynslóð við starfsemi Vinnslustöðvarinnar og íslenskan sjávarútveg.