Tindur Snær Sigurbjörnsson hefur lokið sveinsprófi í veiðarfæratækni (netagerð) eftir að hafa sameinað nám og störf hjá Vinnslustöðinni undanfarin ár. Hann hefur verið á námsstyrk hjá fyrirtækinu frá árinu 2024 og starfað samhliða námi sínu á netaverkstæði VSV, auk þess að stökkva reglulega á sjó þegar mannskap hefur vantað.

Tindur segir áhugann á faginu og þau tækifæri sem það býður upp á hafa ráðið miklu þegar kom að námsvalinu.

„Það var vöntun á fólki í þessa iðngrein og ég sá tækifæri. Mér hefur líka alltaf fundist þessi vinna og allt í kringum hana mjög skemmtilegt,“ segir hann.

Aðspurður hvað hafi komið sér mest á óvart í náminu nefnir Tindur að það sé töluvert meira á bak við fagið en margir átta sig á.

„Það kom mér á óvart hvað það er mikil stærðfræði í þessu og hvað þarf að spá í hverjum einasta þætti í veiðarfærunum. Allt virkar ef rétt er gert, en ef eitt er vitlaust þá virkar ekkert.“

Námið hefur farið fram með vinnu en hann segir fyrirkomulagið hafa hentað vel.

„Ég hef bæði verið til sjós og á netaverkstæðinu með þessu námi. Það góða er að kennslan er í fjarnámi hjá Fisktækniskólanum þannig að kvöld og helgar hafa nýst í námið.“

Á netaverkstæðinu hefur Tindur unnið með Jóa og Sigurbirni, föður sínum, og segir þar hafa safnast mikil reynsla og þekking.

„Ég lærði hagnýtni hjá þeim upp á nýjan tein og alls konar trix í faginu sem maður hafði ekki lært áður.“

Hann segir reynsluna af sjónum einnig hafa hjálpað mikið.

„Mér finnst best að sjá hvernig hlutirnir virka og hvað hver einn hlutur gerir. Þá er líka auðveldara að sjá fyrir sér hvað má bæta í vinnunni á sjó.“

Það sem Tindur segir skemmtilegast við fagið er fjölbreytnin.

„Þetta er svo viðtæk vinna og það er alltaf eitthvað nýtt á nálinni. Það er nánast aldrei sami vinnudagurinn.“

Framtíðarsýnin er einnig skýr. „Ég ætla að halda áfram að fræða mig tengt útgerð og fara í meistarann í netagerð.“

Og þegar hann er spurður hvort hann myndi mæla með náminu við ungt fólk stendur ekki á svarinu:

„Ekki spurning. Það eru endalaus tækifæri í þessu starfi – og þá ekki síst ef menn vilja fara út fyrir landsteinana.“

Að lokum segist Tindur vilja koma á framfæri þakklæti til þeirra sem hafa stutt hann á leiðinni. „Ég vil þakka þeim sem hafa aðstoðað mig – þeir vita hverjir þeir eru.“