Ísleifur VE, skip Vinnslustöðvarinnar, kom til heimahafnar í dag með fyrsta kolmunnafarminn sem tekið er á móti í Eyjum á þessu ári. Í skipinu voru um 2.000 tonn sem veiddust suður af Færeyjum.
„Kolmunninn er horaður ennþá og á eftir að bæta á sig þegar kemur fram á sumarið. Vertíðin lítur annars vel út, við heyrum að mikið hafi fengist af kolmunna við Írland í vetur og úr þeim sama stofni veiddum við nú,“ segir Helgi Geir Valdimarsson, skipstjóri á Ísleifi.
„Við sigldum 420 mílur af miðunum til Eyja og vorum hálfan annan sólarhring á leiðinni í slæmu veðri á kafla. Ég geri ráð fyrir því að við förum út aftur á morgun.“
Um borð í Ísleifi í veiðiferðinni.
